PR Website

Lord Thomas and Annet

No: 73; variant: 73[I]

  1. Fair Annie an Sweet Willie Sat a' day on yon hill; Whan day was gane an night was comd, They hadna said their fill.
  2. Willie spak but ae wrang word, An Annie took it ill: 'I'll never marry a fair woman Against my friends's will.'
  3. Annie spak but ae wrang word, An Willy lookit down: 'If I binna gude eneugh for yer wife, I'm our-gude for yer loun.'
  4. Willie's turnd his horse's head about, He's turnd it to the broom, An he's away to his father's bower, I the ae light o the moon.
  5. Whan he cam to his father's bower, [He tirlt at the pin; Nane was sae ready as his father To rise an let him in.]
  6. 'An askin, an askin, dear father, An askin I'll ask thee;' 'Say on, say on, my son Willie, Whatever your askin be.'
  7. 'O sall I marry the nit-brown bride, Has corn, caitle an kye, Or sall I marry Fair Annie, Has nought but fair beauty?'
  8. 'Ye ma sit a gude sate, Willy, Wi corn, caitle an kye; But ye'll but sit a silly sate Wi nought but fair beauty.'
  9. Up than spak his sister's son, Sat on the nurse's knee, Sun-bruist in his mother's wame, Sun-brunt on his nurse's knee:
  10. 'O yer hogs will die out i the field, Yer kye ill die i the byre; An than, whan a' yer gear is gane, A fusom fag by yer fire! But a' will thrive at is wi you An ye get yer heart's desire.'
  11. Willie's turnd his horse's head about, He's away to his mother's bour, etc.
  12. 'O my hogs ill die out i the field, My kye die i the byre, An than, whan a' my gear is gane, A fusom fag bi my fire! But a' will thrive at is wi me Gin I get my heart's desire.'
  13. Willie's, etc., He's awae to his brother's bower, etc.
  14. ' ' ' ' sister's bower, etc.
  15. Than Willie has set his wadin-day Within thirty days an three, An he has sent to Fair Annie His waddin to come an see.
  16. The man that gade to Fair Annie Sae weel his errant coud tell: 'The morn it's Willie's wadin-day, Ye maun be there yer sell.'
  17. 'Twas up an spak her aged father, He spak wi muckle care; 'An the morn be Willie's wadin-day, I wate she maun be there.
  18. 'Gar take a steed to the smiddie, Caw on o it four shoon; Gar take her to a merchant's shop, Cut off for her a gown.'
  19. She wadna ha 't o the red sae red, Nor yet o the grey sae grey, But she wad ha 't o the sky couler That she woor ilka day.

  1. There war four-an-twontie gray goss-hawks A flaffin their wings sae wide, To flaff the stour thra off the road That Fair Annie did ride.
  2. The[re] war four-a-twontie milk-white dows A fleein aboon her head, An four-an-twontie milk-white swans Her out the gate to lead.
  3. Whan she cam to St Marie's kirk, She lightit on a stane; The beauty o that fair creature Shone oer mony ane.
  4. 'Twas than out cam the nit-brown bride, She spak wi muckle spite; 'O where gat ye the water, Annie, That washes you sae white?'
  5. 'I gat my beauty Where ye was no to see; I gat it i my father's garden, Aneath an apple tree.
  6. 'Ye ma wash i dubs,' she said, 'An ye ma wash i syke, But an ye wad wash till doomsday Ye neer will be as white.
  7. 'Ye ma wash i dubs,' she said, 'An ye ma wash i the sea, But an ye soud wash till doomsday Ye'll neer be as white as me.
  8. 'For I gat a' this fair beauty Where ye gat never none, For I gat a' this fair beauty Or ever I was born.'
  9. It was than out cam Willie, Wi hats o silks and flowers; He said, Keep ye thae, my Fair Annie, An brook them weel for yours.'
  10. 'Na, keep ye thae, Willie,' she said, 'Gie them to yer nit-brown bride; Bid her wear them wi mukle care, For woman has na born a son Sal mak my heart as sair.'
  11. Annie's luppen on her steed An she has ridden hame, Than Annie's luppen of her steed An her bed she has taen.
  12. When mass was sung, an bells war rung, An a' man bound to bed, An Willie an his nit-brown bride I their chamber war laid.
  13. They war na weel laid in their bed, Nor yet weel faen asleep, Till up an startit Fair Annie, Just up at Willie's feet.
  14. 'How like ye yer bed, Willie? An how like ye yer sheets? An how like ye yer nut-brown bride, Lies in yer arms an sleeps?'
  15. 'Weel eneugh I like my bed, Annie, Weel eneugh I like my sheets; But wae be to the nit-brown bride Lies in my arms an sleeps!'
  16. Willie's ca'd on his merry men a' To rise an pit on their shoon; 'An we'll awae to Annie's bower, Wi the ae light o the moon.'
  17. An whan he cam to Annie's bower, He tirlt at the pin; Nane was sae ready as her father To rise an let him in.
  18. There was her father a[n] her se'en brethren A makin to her a bier, Wi ae stamp o the melten goud, Another o siller clear.
  19. When he cam to the chamber-door Where that the dead lay in, There was her mother an six sisters A makin to her a sheet, Wi ae drap o . . . . Another o silk sae white.
  20. 'Stand by, stand by now, ladies a', Let me look on the dead; The last time that I kiss[t] her lips They war mair bonny red.'
  21. 'Stand by, stand by now, Willie,' they said, 'An let ye her alane; Gin ye had done as ye soud done, She wad na there ha lien.'
  22. 'Gar deal, gar deal at Annie's burrial The wheat bread an the wine, For or the morn at ten o clock Ye's deal'd as fast at mine.'