Captain Car, or, Edom o Gordon
No: 178; variant: 178E
- IT fell about the Martinmas time,
When the wind blew shrill and cauld,
Said Captain Gordon to his men,
We'll a' draw to som hauld.
- 'And whatena hauld shall we draw to,
To be the nearest hame?'
'We will draw to the ha o bonny Cargarff;
The laird is na at hame.'
- The lady sat on her castle-wa,
Beheld both dale and down;
And she beheld the fause Gordon
Come halycon to the town.
- 'Now, Lady Cargarff, gie ower yer house,
Gie ower yer house to me;
Now, Lady Cargarff, gie ower yer house,
Or in it you shall die.'
- 'I'll no gie ower my bonny house,
To lord nor yet to loun;
I'll no gie ower my bonny house
To the traitors of Auchindown.'
- Then up and spak her youngest son,
Sat at the nourice's knee:
'O mother dear, gie ower yer house,
For the reek o't smothers me.'
- 'I would gie a' my goud, my child,
Sae would I a' my fee,
For ae blast o the westlan win,
To blaw the reek frae thee.'
- Then up and spak her eldest heir,
He spak wi muckle pride:
'Now mother dear, keep weel yer house,
And I'll fight by yer side.'