No: 17; variant: 17H
- 'HYND HORN fair, and Hynd Horn free,
O where were you born, in what countrie?'
- 'In gude greenwood, there I was born,
And all my forbears me beforn.
- 'O seven years I served the king,
And as for wages, I never gat nane;
- 'But ae sight o his ae daughter,
And that was thro an augre bore.
- 'My love gae me a siller wand,
'Twas to rule ower a' Scotland.
- 'And she gae me a gay gowd ring,
The virtue o't was above a' thing.'
- 'As lang's this ring it keeps the hue,
Ye'll know I am a lover true:
- 'But when the ring turns pale and wan,
Ye'll know I love another man.'
- He hoist up sails, and awa saild he,
And saild into a far countrie.
- And when he lookd upon his ring,
He knew she loved another man.
- He hoist up sails and home came he,
Home unto his ain countrie.
- The first he met on his own land,
It chancd to be a beggar man.
- 'What news, what news, my gude auld man?
What news, what news, hae ye to me?'
- 'Nae news, nae news,' said the auld man,
'The morn's our queen's wedding day.'
- 'Will ye lend me your begging weed?
And I'll lend you my riding steed.'
- 'My begging weed will ill suit thee,
And your riding steed will ill suit me.'
- But part be right, and part be wrang,
Frae the beggar man the cloak he wan.
- 'Auld man, come tell to me your leed;
What news ye gie when ye beg your bread.'
- 'As ye walk up unto the hill,
Your pike staff ye lend ye till.
- 'But whan ye come near by the yett,
Straight to them ye will upstep.
- 'Take nane frae Peter, nor frae Paul,
Nane frae high or low o them all.
- 'And frae them all ye will take nane,
Until it comes frae the bride's ain hand.'
- He took nane frae Peter nor frae Paul,
Nane frae the high nor low o them all.
- And frae them all he would take nane,
Until it came frae the bride's ain hand.
- The bride came tripping down the stair,
The combs o red gowd in her hair.
- A cup o red wine in her hand,
And that she gae to the beggar man.
- Out o the cup he drank the wine,
And into the cup he dropt the ring.
- 'O got ye't by sea, or got ye't by land,
Or got ye't on a drownd man's hand?'
- 'I got it not by sea, nor got it by land,
Nor got I it on a drownd man's hand.
- 'But I got it at my wooing gay,
And I'll gie't you on your wedding day.'
- 'I'll take the red gowd frae my head,
And follow you, and beg my bread.
- 'I'll take the red gowd frae my hair,
And follow you for evermair.'
- Atween the kitchen and the ha,
He loot his cloutie cloak down fa.
- And wi red gowd shone ower them a',
And frae the bridegroom the bride he sta.