PR Website

The Laird of Logie

No: 182; variant: 182A

  1. I WILL sing, if ye will hearken, If ye will hearken unto me; The king has taen a poor prisoner, The wanton laird o Young Logie.
  2. Young Logie’s laid in Edinburgh chapel, Carmichael’s the keeper o the key; And May Margaret’s lamenting sair, A’ for the love of Young Logie.
  3. ‘Lament, lament na, May Margaret, And of your weeping let me be; For ye maun to the king himsell, To seek the life of Young Logie.’
  4. May Margaret has kilted her green cleiding, And she has curld back her yellow hair: ‘If I canna get Young Logie’s life, Farewell to Scotland for evermair!’
  5. When she came before the king, She knelit lowly on her knee: ‘O what’s the matter, May Margaret? And what needs a’ this courtesie?’
  6. ‘A boon, a boon, my noble liege, A boon, a boon, I beg o thee, And the first boon that I come to crave Is to grant me the life of Young Logie.’
  7. ‘O na, O na, May Margaret, Forsooth, and so it mauna be; For a’ the gowd o fair Scotland Shall not save the life of Young Logie.’
  8. But she has stown the king’s redding-kaim, Likewise the queen her wedding knife, And sent the tokens to Carmichael, To cause Young Logie get his life.
  9. She sent him a purse o the red gowd, Another o the white monie; She sent him a pistol for each hand, And bade him shoot when he gat free.
  10. When he came to the Tolbooth stair, There he let his volley flee; It made the king in his chamber start, Een in the bed where he might be.
  11. ‘Gae out, gae out, my merrymen a’, And bid Carmichael come speak to me; For I’ll lay my life the pledge o that That yon’s the shot o Young Logie.’
  12. When Carmichael came before the king, He fell low down upon his knee; The very first word that the king spake Was, Where’s the laird of Young Logie?
  13. Carmichael turnd him round about, I wot the tear blinded his ee: ‘There came a token frae your Grace Has taen away the laird frae me.’
  14. ‘Hast thou playd me that, Carmichael? And hast thou playd me that?’ quoth he; ‘The morn the Justice Court’s to stand, And Logie’s place ye maun supplie.’
  15. Carmichael’s awa to Margaret’s bower, Even as fast as he may dree: ‘O if Young Logie be within, Tell him to come and speak with me.’
  16. May Margaret turnd her round about, I wot a loud laugh laughed she: ‘The egg is chippd, the bird is flown, Ye’ll see nae mair of Young Logie.’
  17. The tane is shipped at the pier of Leith, The tother at the Queen’s Ferrie, And she’s gotten a father to her bairn, The wanton laird of Young Logie.