Sir Hugh, or the Jew’s Daughter
No: 155; variant: 155B
- THE rain rins doun through Mirry-land toune,
Sae dois it doune the Pa;
Sae dois the lads of Mirry-land toune,
Whan they play at the ba.
- Than out and cam the Jewis dochter,
Says, Will ye cum in and dine?
‘I winnae cum in, I cannae cum in,
Without my play-feres nine.’
- Scho powd an apple reid and white,
To intice the young thing in:
Scho powd an apple white and reid,
And that the sweit bairne did win.
- And scho has taine out a little pen-knife,
And low down by her gair;
Scho has twin’d the yong thing and his life,
A word he nevir spak mair.
- And out and cam the thick, thick bluid,
And out and cam the thin,
And out and cam the bonny herts bluid;
Thair was nae life left in.
- Scho laid him on a dressing-borde,
And drest him like a swine,
And laughing said, Gae nou and pley
With your sweit play-feres nine.
- Scho rowd him in a cake of lead,
Bade him lie stil and sleip;
Scho cast him in a deip draw-well,
Was fifty fadom deip.
- Whan bells wer rung, and mass was sung,
And every lady went hame,
Than ilka lady had her yong sonne,
Bot Lady Helen had nane.
- Scho rowd hir mantil hir about,
And sair, sair gan she weip,
And she ran into the Jewis castel,
Whan they wer all asleip.
- ‘My bonny Sir Hew, my pretty Sir Hew,
I pray thee to me speik:’
‘O lady, rinn to the deip draw-well,
Gin ye your sonne wad seik.’
- Lady Helen ran to the deip draw-well,
And knelt upon her kne:
‘My bonny Sir Hew, an ye be here,
I pray thee speik to me.’
- ‘The lead is wondrous heavy, mither,
The well is wondrous deip;
A keen pen-knife sticks in my hert,
A word I dounae speik.
- ‘Gae hame, gae hame, my mither deir,
Fetch me my windling sheet,
And at the back o Mirry-land toun,
It’s thair we twa sall meet.’