The Twa Sisters
No: 10; variant: 10[V]
- There dwelt twa sisters in a bower,
Benorie, O Benorie
The youngest o them was the fairest flower.
In the merry milldams o Benorie
- There cam a wooer them to woo,
. . . . .
. . . . .
- He’s gien the eldest o them a broach and a real,
Because that she loved her sister weel.
- He’s gien the eldest a gay penknife,
He loved the youngest as dear as his life.
- ‘O sister, O sister, will ye go oer yon glen,
And see my father’s ships coming in?’
- ‘O sister dear, I darena gang,
Because I’m feard ye throw me in.’
- ‘O set your foot on yon sea stane,
And was yeer hands in the sea foam.’
- She set her foot on yon sea stane,
To wash her hands in the sea foam.
- . . . . .
But the eldest has thrown the youngest in.
- ‘O sister, O sister, lend me your hand,
And ye’se get William and a’ his land.’
- The miller’s daughter cam out clad in red,
Seeking water to bake her bread.
- ‘O father, O father, gae fish yeer mill-dam,
There’s either a lady or a milk-[white] swan.’
- The miller cam out wi his lang cleek,
And he cleekit the lady out by the feet.
From the bonny milldam, etc.
- Ye wadna kend her pretty feet,
The American leather was sae neat.
- Ye wadna kend her pretty legs,
The silken stockings were so neat tied.
- Ye wadna kend her pretty waist,
The silken stays were sae neatly laced.
- Ye wadna kend her pretty face,
It was sae prettily preend oer wi lace.
- Ye wadna kend her yellow hair,
It was sae besmeared wi dust and glar.
- By cam her father’s fiddler fine,
And that lady’s spirit spake to him.
- She bad him take three taits o her hair,
And make them three strings to his fiddle sae rare.
- ‘Take two of my fingers, sae lang and sae white,
And make them pins to your fiddle sae neat.’
- The ae first spring that the fiddle played
Was, Cursed be Sir John, my ain true-love.
- The next spring that the fiddle playd
Was, Burn burd Hellen, she threw me in.